सावंतवाडी प्रतिनिधी✍️ : मळगाव-सावंतवाडी मार्गावर अचानक रस्त्यावर आलेल्या गव्याने एका धावत्या वाहनाला जोरदार धडक दिल्याची घटना घडली. या धडकेत वाहनाचे नुकसान झाले. मात्र, सुदैवाने वाहनातील चालक आणि प्रवासी सुखरूप बचावले असून, मोठा अनर्थ टळला.
मळगाव-सावंतवाडी मार्गावर गेल्या काही काळापासून वन्यप्राण्यांचा वावर सातत्याने दिसून येत आहे. विशेषतः गवे अचानक रस्त्यावर येत असल्याने या मार्गावरून प्रवास करणाऱ्या वाहनचालकांना धोका निर्माण झाला आहे. या घटनेमुळे वन्यप्राण्यांच्या वावराचा प्रश्न पुन्हा एकदा ऐरणीवर आला आहे.
विशेषतः रात्रीच्या वेळी या मार्गावरून प्रवास करताना वाहनचालकांनी अधिक सतर्क राहण्याची गरज आहे. वन्यप्राणी अचानक रस्त्यावर येण्याची शक्यता लक्षात घेऊन वाहनांचा वेग मर्यादित ठेवावा आणि सावधगिरीने प्रवास करावा, असे आवाहन करण्यात येत आहे.
