कुडाळ प्रतिनिधी ✍️: सिंधुदुर्ग जिल्ह्यात चर्चेत असलेल्या दामिनी किरण पालव खून प्रकरणातील संशयित आरोपी साहिल विश्राम धुरी याच्या पोलीस कोठडीत आणखी चार दिवसांची वाढ करण्यात आली आहे. २४ ऑक्टोबर रोजी पोलीस कोठडीची मुदत संपल्यानंतर पोलिसांनी संशयित आरोपीला अधिक तपासासाठी कुडाळ दिवाणी न्यायालयात हजर केले. यावेळी न्यायालयाने त्याला आणखी चार दिवसांची पोलीस कोठडी सुनावली.
साहिल धुरी याच्याविरोधात भारतीय न्यायसंहितेच्या कलम १०३ (१) अंतर्गत खुनाचा गुन्हा दाखल करण्यात आला आहे. तपासादरम्यान पोलिसांनी संशयित आरोपीकडून गुन्ह्यात वापरल्याचा संशय असलेला सुरा, कपडे, मोबाईल तसेच गुन्ह्यात वापरण्यात आल्याची माहिती असलेली हिरोहोंडा दुचाकी जप्त केली आहे, अशी माहिती कुडाळचे पोलीस निरीक्षक विकास बडवे यांनी न्यायालयात दिली.
या प्रकरणाच्या तपासात आणखी काही बाबींची चौकशी व तपास करणे आवश्यक असल्याने संशयित आरोपीच्या पोलीस कोठडीत वाढ करण्याची मागणी पोलिसांकडून करण्यात आली. न्यायालयाने पोलिसांची ही मागणी मान्य करत साहिल धुरी याला आणखी चार दिवसांची पोलीस कोठडी सुनावली.
दरम्यान, दामिनी पालव खून प्रकरणाच्या पुढील तपासात आणखी कोणते धागेदोरे आणि खुलासे समोर येतात, याकडे लक्ष लागले आहे.
