वेंगुर्ला प्रतिनिधी✍️: ग्रामीण भागातील महिला लोकप्रतिनिधी तसेच अंगणवाडी सेविका आणि मदतनीस यांच्या उल्लेखनीय कार्याचा गौरव करण्यासाठी वेताळ प्रतिष्ठान सिंधुदुर्ग–तुळस यांच्या वतीने ‘नारी सन्मान सोहळ्या’चे आयोजन करण्यात आले. या सोहळ्यात मठ, तुळस, होडावडे, पाल आणि मातोंड या पाच गावांतील तब्बल १०० महिलांचा मानपत्र, शाल व श्रीफळ देऊन सन्मान करण्यात आला.
तुळस येथील कर्मयोगी रामभाऊ तुळसकर स्मृती सभागृहात झालेल्या या कार्यक्रमाचे उद्घाटन पंचायत समिती सभापती शंकर घारे यांच्या हस्ते झाले. जिल्हा परिषद सदस्य सुजाता पडवळ प्रमुख अतिथी म्हणून उपस्थित होत्या. यावेळी सरपंच रश्मी परब, कावेरी गावडे, रुपाली नाईक, रसिका केळुसकर आणि डॉ. विवेक चव्हाण यांची प्रमुख उपस्थिती होती.
महिला नेतृत्वाला प्रोत्साहन गरजेचे : शंकर घारे
ग्रामीण विकासामध्ये महिला लोकप्रतिनिधींचे योगदान अत्यंत महत्त्वाचे आहे. महिलांनी नेतृत्वाच्या भूमिकेत पुढे येण्यासाठी त्यांना प्रोत्साहन मिळण्याबरोबरच त्यांच्या कार्याला कुटुंबीय आणि समाजाचे पाठबळ मिळणे आवश्यक आहे. महिला नेतृत्व अधिक सक्षम झाले, तर ग्रामविकासाच्या प्रक्रियेला निश्चितच अधिक गती मिळेल, असे प्रतिपादन पंचायत समिती सभापती शंकर घारे यांनी केले.
महिलांच्या कार्याचा गौरव प्रेरणादायी : सुजाता पडवळ
महिला लोकप्रतिनिधी, अंगणवाडी सेविका आणि मदतनीस या ग्रामीण समाजाच्या जडणघडणीत महत्त्वाची भूमिका बजावत आहेत. गावातील विविध जबाबदाऱ्या पार पाडण्यासोबतच महिला सक्षमीकरण, बालसंगोपन, पोषण आणि पूर्वप्राथमिक शिक्षणाच्या क्षेत्रात त्यांचे योगदान उल्लेखनीय आहे. अशा महिलांच्या कार्याची दखल घेऊन त्यांचा सन्मान करणे ही समाजासाठी निश्चितच प्रेरणादायी बाब आहे, असे जिल्हा परिषद सदस्य सुजाता पडवळ यांनी सांगितले.
प्रमुख अतिथी डॉ. विवेक चव्हाण यांनी वेताळ प्रतिष्ठान सिंधुदुर्ग–तुळसच्या सामाजिक उपक्रमांचे कौतुक केले. प्रतिष्ठानच्या माध्यमातून कला, क्रीडा, शिक्षण, समाजसेवा आणि आरोग्य क्षेत्रात विविध उपक्रम राबविले जात असल्याबद्दल त्यांनी समाधान व्यक्त केले.
सन्मानामुळे महिलांमध्ये आनंद
आपल्या कार्याची अशा पद्धतीने दखल घेऊन सन्मान करण्यात आल्याने आनंद आणि समाधान वाटत असल्याची भावना उपस्थित महिलांनी व्यक्त केली. वेताळ प्रतिष्ठानने केलेल्या या गौरवाबद्दल त्यांनी कृतज्ञता व्यक्त केली. दैनंदिन कौटुंबिक जबाबदाऱ्या पार पाडतानाच समाजासाठी योगदान देणाऱ्या महिलांना या सन्मानामुळे निश्चितच प्रोत्साहन मिळाले.
प्रतिष्ठानचे अध्यक्ष डॉ. सचिन वासुदेव परुळकर यांनी प्रास्ताविक केले. शैलजा परूळकर यांनी आभार मानले. कार्यक्रमाच्या यशस्वी आयोजनासाठी महेश राऊळ, माधव तुळसकर, विवेक तिरोडकर, डॉ. गोविंद धुरी, रोहन राऊळ, नाना राऊळ, प्रसाद भणगे, सानिया वराडकर, वैष्णवी परूळकर, निकिता कबरे, भूमी परूळकर आणि भार्गवी परूळकर यांनी सहकार्य केले.
