देवगड प्रतिनिधी✍️: संकष्टी चतुर्थीच्या शुभमुहूर्तावर देवगड हापूस आंब्याच्या यंदाच्या हंगामाची उत्साहात सुरुवात झाली आहे. देवगड तालुक्यातील गिर्ये-रामेश्वर येथील प्रगतशील बागायतदार श्री. निलेश वसंत बांदकर यांच्या बागेतील यंदाच्या मोसमातील पहिली हापूस आंब्याची पेटी मुंबई बाजारपेठेकडे रवाना करण्यात आली.
विघ्नहर्त्या श्री गणरायाच्या आशीर्वादाने हापूसची पहिली पेटी मुंबईच्या बाजारपेठेत पाठविण्यात आल्याने बांदकर कुटुंबीयांमध्ये आनंदाचे वातावरण आहे. निसर्गाची साथ, बागेतील योग्य नियोजन आणि बागायतदारांचे अथक परिश्रम यांच्या जोरावर यंदाच्या हंगामातील पहिला हापूस बाजारपेठेत दाखल होत आहे.
देवगड हापूसला देशभरात विशेष मागणी असून, त्याच्या दर्जेदार चवीमुळे ग्राहकांमध्ये या आंब्याला मोठी पसंती मिळते. हंगामाच्या सुरुवातीलाच मुंबई बाजारपेठेत देवगड हापूसची आवक सुरू झाल्याने आंबा बागायतदारांमध्येही उत्साह निर्माण झाला आहे.
या पहिल्या पेटीच्या रवाना होण्याबद्दल प्रगतशील बागायतदार निलेश वसंत बांदकर यांचे अभिनंदन करण्यात येत असून, यंदाचा हापूस हंगाम त्यांच्या बागेसाठी तसेच देवगडच्या आंबा बागायतदारांसाठी फलदायी ठरावा, अशा शुभेच्छा व्यक्त होत आहेत.
