मुंबई प्रतिनिधी✍️: कोयना धरणातून वीजनिर्मितीनंतर कोकणातील नद्यांमार्गे समुद्राला मिळणाऱ्या पाण्याचे योग्य नियोजन करून ते पाणी कोकणासह महाराष्ट्रातील अन्य दुष्काळग्रस्त भागांना उपलब्ध करून द्यावे, अशी महत्त्वपूर्ण मागणी माजी केंद्रीय मंत्री तथा माजी खासदार हुसेन दलवाई यांनी मुख्यमंत्री देवेंद्र फडणवीस यांच्याकडे केली आहे. पाणीटंचाई आणि दुष्काळसदृश परिस्थितीचा सामना करणाऱ्या शेतकरी व नागरिकांना दिलासा देण्यासाठी शासनाने तातडीने ठोस उपाययोजना कराव्यात, असे आवाहनही त्यांनी केले आहे.
कोकणात पाण्याची मुबलकता, तरीही पाणीटंचाईचे संकट! यंदा पावसाच्या कमतरतेमुळे कोकणातील भातशेतीसह कडधान्यांच्या पिकांचे मोठ्या प्रमाणात नुकसान झाले आहे. अनेक गावांमध्ये पाणीटंचाईची समस्या निर्माण झाली असून, ग्रामीण भागातील नागरिक आणि शेतकऱ्यांच्या अडचणी वाढल्या आहेत. पावसाळ्यात कोकणातील नद्यांमधून मोठ्या प्रमाणात पाणी समुद्राला मिळते; मात्र पावसाने ओढ दिल्यानंतर याच भागातील नागरिकांना पाणीटंचाईचा सामना करावा लागतो. या विरोधाभासी परिस्थितीवर मात करण्यासाठी उपलब्ध जलस्रोतांचे प्रभावी नियोजन करण्याची गरज असल्याची सूचना हुसेन दलवाई यांनी केली आहे.
कोयनेच्या पाण्याचा लोकहितासाठी वापर करा!
कोयना धरणातील पाणी वीजनिर्मितीसाठी वापरल्यानंतर ते कोकणातील नद्यांमार्गे समुद्राला मिळते. या पाण्याचा अधिकाधिक लोकहितासाठी उपयोग करण्याच्या दृष्टीने शासनाने सर्वंकष अभ्यास करून दीर्घकालीन योजना आखावी, अशी मागणी दलवाई यांनी केली आहे. यासाठी पाण्याची उपलब्धता, तांत्रिक व्यवहार्यता, जलसाठवण क्षमता आणि पाणीवाटपाचे नियोजन या बाबींचा सखोल अभ्यास करणे आवश्यक आहे. योग्य नियोजनाच्या माध्यमातून कोकणातील पाणीटंचाईग्रस्त गावांसह महाराष्ट्रातील अन्य दुष्काळग्रस्त भागांना पाणी उपलब्ध करून देण्याच्या शक्यतांचा विचार करावा, असेही त्यांनी सुचवले आहे.
शेतकऱ्यांना आर्थिक मदत देण्याची मागणी
पावसाच्या कमतरतेमुळे शेतीचे नुकसान झालेल्या शेतकऱ्यांना आर्थिक मदत द्यावी, ग्रामीण भागातील पिण्याच्या पाण्याचा प्रश्न प्राधान्याने सोडवावा आणि भविष्यातील पाणीटंचाई टाळण्यासाठी प्रभावी जलव्यवस्थापनाची अंमलबजावणी करावी, अशी मागणीही दलवाई यांनी मुख्यमंत्र्यांकडे निवेदनाद्वारे केली आहे.कोकणातील उपलब्ध पाणीसाठ्याचे योग्य व्यवस्थापन केल्यास पाणीटंचाईच्या काळात त्याचा मोठा उपयोग होऊ शकतो. त्यामुळे या प्रश्नाकडे केवळ तात्पुरता उपाय म्हणून न पाहता भविष्यातील पाणीसमस्येवर कायमस्वरूपी तोडगा काढण्याच्या दृष्टीने शासनाने नियोजन करावे, अशी अपेक्षा त्यांनी व्यक्त केली आहे.
कोयनेच्या पाण्याचा अधिकाधिक लोकहितासाठी उपयोग करून कोकणासह राज्यातील दुष्काळग्रस्त भागांना दिलासा देण्यासाठी शासनाने सकारात्मक भूमिका घ्यावी, हीच हुसेन दलवाई यांची प्रमुख मागणी आहे.
