मुंबई प्रतिनिधी✍️: अस्मानी संकट आणि दुष्काळी परिस्थितीमुळे आर्थिक अडचणीत सापडलेल्या शेतकरी कुटुंबांना दिवाळीच्या पार्श्वभूमीवर मदतीचा हात देण्यासाठी शिवसेनेच्या वतीने दिवाळी शिधा वाटपाचा उपक्रम राबविण्यात येत आहे. शिवसेना मुख्य नेते तथा उपमुख्यमंत्री एकनाथ शिंदे यांच्या पुढाकारातून या अभियानाची सुरुवात करण्यात आली.
दसऱ्याच्या मुहूर्तावर दुष्काळग्रस्त शेतकरी कुटुंबांना दिवाळीचा शिधा पोहोचविणाऱ्या तब्बल २०० ट्रकना हिरवा झेंडा दाखवून रवाना करण्यात आले. विदर्भ, मराठवाडा, उत्तर महाराष्ट्र, पश्चिम महाराष्ट्र तसेच कोकणातील दुष्काळग्रस्त भागांतील शेतकरी कुटुंबांपर्यंत हा शिधा पोहोचविण्यात येत आहे.
दुष्काळामुळे अनेक शेतकऱ्यांचे पीक हातातून गेल्याने त्यांच्या कुटुंबांवर आर्थिक संकट ओढवले आहे. अशा परिस्थितीत दिवाळीचा सण साजरा करताना निर्माण होणारी आर्थिक अडचण लक्षात घेऊन हा उपक्रम हाती घेण्यात आला आहे.
या अभियानात शिवसेनेचे लोकप्रतिनिधी, पदाधिकारी आणि शिवसैनिक सहभागी होत असून, विविध भागांतील पात्र शेतकरी कुटुंबांना दिवाळी शिध्याचे वाटप केले जात आहे. शेतकरी कुटुंबांपर्यंत मदत पोहोचवून त्यांच्या सणातील आनंदात सहभागी होण्याचा या उपक्रमाचा उद्देश आहे.
दुष्काळाच्या काळात शेतकरी कुटुंबांना आधार देणे, त्यांच्या अडचणींमध्ये मदतीसाठी पुढे येणे आणि सामाजिक बांधिलकी जपणे, या उद्देशाने हा उपक्रम राबविण्यात येत असल्याचे शिवसेनेच्या वतीने सांगण्यात आले.
