वेंगुर्ला प्रतिनिधी✍️: समाजाच्या अपेक्षांनुसार आपण वागत नाही किंवा इतरांपेक्षा वेगळे आहोत म्हणून स्वतःला कमी लेखण्याची गरज नाही. उलट, आपल्या वेगळेपणाचा स्वीकार करून स्वतःमधील क्षमता ओळखणे महत्त्वाचे आहे. एखाद्याने नाकारल्याने व्यक्तीचे मूल्य कमी होत नाही. भावनिक संघर्षांना सामोरे जात, भूतकाळातील जखमांमधून सावरत स्वतःची नव्याने ओळख निर्माण करणे, हाच आत्मशोधाचा खरा प्रवास आहे, असे प्रतिपादन ॲड. देवदत्त परुळेकर यांनी केले. ‘वाचू आनंदे’ या साहित्यिक उपक्रमात त्यांनी ॲन कार्सन यांच्या ‘ऑटोबायोग्राफी ऑफ रेड’ या काव्यात्मक कादंबरीचे विविध पैलू उलगडून दाखवले.
ग्रीक पुराणकथेतील गेरिऑन या व्यक्तिरेखेच्या जीवनप्रवासाचा आधार घेत परुळेकर यांनी कादंबरीतील भावनिक, सामाजिक आणि तात्त्विक आशय स्पष्ट केला. स्वतःच्या वेगळेपणाची जाणीव, प्रेमातील गुंतागुंत, नकारानंतर पुन्हा उभे राहण्याची ताकद आणि स्वतःच्या अस्तित्वाचा शोध हे या कादंबरीचे महत्त्वाचे विषय असल्याचे त्यांनी सांगितले. कादंबरीतील घटनांचा मानवी जीवनातील अनुभवांशी संबंध जोडत त्यांनी साहित्याचा आशय श्रोत्यांसमोर प्रभावीपणे मांडला.
प्रेमात भावनिक जवळिकीसोबत आदरही आवश्यक
गेरिऑनचे हेराक्लीसवरील प्रेम आणि त्यातून निर्माण होणारा भावनिक संघर्ष यांचे विश्लेषण करताना परुळेकर यांनी प्रेमाची तीव्रता आणि नात्याची गुणवत्ता यांतील फरक अधोरेखित केला. केवळ प्रेमाची भावना नाते टिकवण्यासाठी पुरेशी नसते; त्यासाठी परस्परांचा आदर, भावनिक जबाबदारी आणि नात्यातील स्पष्टता यांनाही महत्त्व असते. नकाराला सामोरे गेल्यानंतर स्वतःच्या क्षमतेवर प्रश्नचिन्ह उपस्थित करण्याऐवजी स्वतःचे अस्तित्व आणि सामर्थ्य ओळखणे गरजेचे आहे, असा संदेश त्यांनी दिला.
गेरिऑनची छायाचित्रणाविषयीची आवड आणि स्वतःची कहाणी व्यक्त करण्याची त्याची धडपड यांतून कलेचे महत्त्व अधोरेखित होते. आपल्या अनुभवांना कलेच्या माध्यमातून अभिव्यक्त करताना व्यक्तीला स्वतःच्या आयुष्याकडे वेगळ्या नजरेने पाहण्याची संधी मिळते. भूतकाळ विसरणे म्हणजे खरे स्वातंत्र्य नव्हे, तर भूतकाळातील अनुभवांचा स्वीकार करून वर्तमानात स्वतःच्या निर्णयांनुसार जगण्याची क्षमता मिळवणे, हा विचारही या कादंबरीतून समोर येत असल्याचे परुळेकर यांनी स्पष्ट केले.
कादंबरीतील कथानकासोबतच त्यातील भावनिक आणि तात्त्विक संदर्भ त्यांनी सोप्या व ओघवत्या शैलीत मांडले. आत्मस्वीकार, प्रेम, विरह, नकारातून सावरणे आणि वैयक्तिक स्वातंत्र्य अशा विविध विषयांवर त्यांनी श्रोत्यांना विचार करण्यास प्रवृत्त केले. या व्याख्यानामुळे कादंबरीची ओळख होण्यासोबतच साहित्याकडे मानवी जीवनाच्या अनुभवांशी जोडून पाहण्याची नवी दृष्टी उपस्थितांना मिळाली.
या कार्यक्रमाला वेंगुर्ला गटशिक्षणाधिकारी अजय ढाणे, पोलीस निरीक्षक निसर्ग ओतारी, नगरसेवक प्रशांत आपटे, नगर वाचनालयाचे कार्यवाह कैवल्य पवार, उपनगराध्यक्ष अभिषेक वेंगुर्लेकर, संयोजक महेंद्र मातोंडकर, प्रदीप कुबल, विठ्ठल करंगुटकर, सिताराम नातू, वासुदेव पेडणेकर, समकालीन कवी वीरधवल परब, नूतन दाभोलकर, मुक्तांगणच्या संस्थापक मंगल परुळेकर, अनुराधा खानोलकर, दिव्या आजगावकर, आरती बांदवलकर, मुक्तांगण महिला मंचच्या अध्यक्षा साक्षी वेंगुर्लेकर, दीपा वाडेकर, रूपा शिरसाट, प्रा. पी. जी. देसाई, राजन पवार, महेश बोवलेकर, सदानंद तावडे, साक्षी परब, सीमा मराठे आणि स्वरूपा सौदागर आदी उपस्थित होते.कार्यक्रमाचे प्रास्ताविक निमंत्रक महेंद्र मातोंडकर यांनी केले. निवृत्त प्राध्यापक महेश बोलेकर यांनी सूत्रसंचालन केले, तर मुक्तांगण महिला मंचच्या अध्यक्षा साक्षी वेंगुर्लेकर यांनी आभार मानले.
