सिंधुदुर्ग दिवाळी सणाच्या पार्श्वभूमीवर बाजारपेठेत मिठाई, फराळ आणि विविध खाद्यपदार्थांची वाढती मागणी लक्षात घेऊन नागरिकांना सुरक्षित व दर्जेदार अन्नपदार्थ मिळावेत, या उद्देशाने अन्न व औषध प्रशासनाने कुडाळ येथे विशेष जनजागृती मोहीम राबविली. ६ नोव्हेंबर रोजी आयोजित या मोहिमेत खाद्यपदार्थांमध्ये वापरण्यात येणारे रंग, त्यांचे प्रमाण आणि सुट्या मसाल्यांची खरेदी-विक्री करताना घ्यावयाची काळजी याबाबत व्यापारी तसेच नागरिकांना मार्गदर्शन करण्यात आले.
सणासुदीच्या दिवसांत मिठाई आणि अन्य खाद्यपदार्थांना मोठी मागणी असते. ग्राहकांना आकर्षित करण्यासाठी खाद्यपदार्थांमध्ये रंगांचा वापर केला जातो. मात्र, असे रंग वापरताना अन्नसुरक्षा नियमांनुसार निर्धारित केलेल्या मर्यादांचे पालन करणे बंधनकारक आहे. अनधिकृत खाद्यरंगांचा वापर करणे किंवा परवानगीपेक्षा जास्त प्रमाणात रंग मिसळणे आरोग्याच्या दृष्टीने धोकादायक ठरू शकते. त्यामुळे खाद्यपदार्थांचे उत्पादन आणि विक्री करताना नियमांचे काटेकोर पालन करण्याच्या सूचना व्यापाऱ्यांना देण्यात आल्या.
मोहिमेदरम्यान सुट्या मसाल्यांच्या खरेदी-विक्रीच्या बाबतीतही विशेष मार्गदर्शन करण्यात आले. मसाल्यांची गुणवत्ता, स्वच्छता, योग्य पद्धतीने साठवणूक तसेच विक्री करताना आवश्यक असलेल्या अन्नसुरक्षा नियमांचे पालन करण्याचे महत्त्व पटवून देण्यात आले. ग्राहकांनीही मसाले आणि इतर खाद्यपदार्थ खरेदी करताना त्यांच्या दर्जाबरोबरच स्वच्छता व सुरक्षिततेची खात्री करूनच खरेदी करावी, असे आवाहन प्रशासनाकडून करण्यात आले.
नागरिकांना सुरक्षित अन्न उपलब्ध करून देण्यासाठी अन्न व्यवसायाशी संबंधित प्रत्येक घटकाने अन्न सुरक्षा व मानके कायद्यातील तरतुदींचे पालन करणे आवश्यक आहे. अन्न भेसळीला आळा घालणे, सुरक्षित अन्नसेवनाबाबत ग्राहकांमध्ये जागरूकता निर्माण करणे आणि या प्रक्रियेत व्यापारी व ग्राहकांचा सक्रिय सहभाग वाढविणे, हा या जनजागृती मोहिमेमागील मुख्य उद्देश आहे.
पालकमंत्री नितेश राणे यांच्या मार्गदर्शनाखाली अन्न व औषध प्रशासनाकडून ही मोहीम राबविण्यात येत आहे. दिवाळीसह सणासुदीच्या काळात नागरिकांना सुरक्षित व गुणवत्तापूर्ण खाद्यपदार्थ उपलब्ध व्हावेत आणि अन्नसुरक्षेबाबत जनजागृती अधिक व्यापक व्हावी, यासाठी प्रशासन प्रयत्नशील आहे.
