कणकवली प्रतिनिधी✍️: महाराष्ट्र ग्रामीण जीवनोन्नती अभियानांतर्गत (उमेद) कणकवली तालुक्यातील सांगवे येथे उमेद व सावित्री महिला स्वयं-सहाय्यता गटाच्या पुढाकारातून सुरू करण्यात आलेल्या गांडूळखत निर्मिती आणि खेकडापालन प्रकल्पाचा उद्घाटन सोहळा विद्यमान जिल्हा परिषद सदस्य संदेश उर्फ गोट्या सावंत यांच्या हस्ते पार पडला.
ग्रामीण भागातील महिलांना आर्थिकदृष्ट्या सक्षम बनविण्यासह त्यांना स्वयंरोजगाराच्या नव्या संधी उपलब्ध करून देण्यासाठी महिला बचत गटांची भूमिका महत्त्वपूर्ण ठरत आहे. या अनुषंगाने गांडूळखत निर्मिती व खेकडापालन यांसारखे पूरक व्यवसाय महिलांसाठी उत्पन्नाचे साधन ठरू शकतात. अशा उपक्रमांमुळे ग्रामीण भागात रोजगारनिर्मितीला चालना मिळेल, असे मत यावेळी व्यक्त करण्यात आले.
या कार्यक्रमाला उमेद अभियानाच्या कणकवली पंचायत समितीच्या तालुका अभियान व्यवस्थापक दक्षता पांजरी, प्रभाग समन्वयक समृद्धी गावडे, तालुका व्यवस्थापक प्रीतम ताम्हणकर, ब्लॉक कर्मचारी मयूर धुमाळ, सांगवे गावचे सरपंच संजय सावंत, उपसरपंच प्रफुल नार्वेकर, संजय कदम, सागर चव्हाण यांच्यासह महिला बचत गटांच्या सदस्या आणि ग्रामस्थ उपस्थित होते.
महिला बचत गटांनी पारंपरिक व्यवसायांबरोबरच गांडूळखत निर्मिती आणि खेकडापालन यांसारखे पूरक व्यवसाय आत्मसात केल्यास महिलांचे आर्थिक सक्षमीकरण होण्यासोबतच गावाच्या ग्रामीण अर्थव्यवस्थेलाही बळकटी मिळेल, असा विश्वास यावेळी उपस्थितांनी व्यक्त केला.