कुडाळ प्रतिनिधी ✍️: हुमरमळा महसूल गाव स्वतंत्र करण्यात आल्यानंतर पाट-गांधीनगरचा समावेश हुमरमळा महसूल गावात करण्यात आला होता. मात्र, या प्रशासकीय बदलामुळे पाट-गांधीनगर येथील नागरिकांना विविध महसूलविषयक कामांसाठी गैरसोयीला सामोरे जावे लागत होते. ही गैरसोय दूर करण्यासाठी पाट-गांधीनगर महसूल सजा पूर्ववत करण्याची मागणी माजी आमदार वैभव नाईक, माजी पंचायत समिती सदस्य अतुल बंगे आणि महेश वेळकर यांनी सातत्याने लावून धरली होती. अखेर या मागणीला यश आले असून पाट-गांधीनगर महसूल सजा पूर्ववत करण्यात आली आहे.
हुमरमळा महसूल गाव स्वतंत्र झाल्यानंतर पाट-गांधीनगरचा समावेश त्यामध्ये करण्यात आला. त्यामुळे स्थानिक नागरिकांना महसूलविषयक कामांसाठी अडचणी निर्माण होत होत्या. पूर्वीची महसूल व्यवस्था कायम ठेवून पाट-गांधीनगरचा महसूल सजा पूर्ववत करावा आणि हुमरमळा महसूल गाव स्वतंत्र ठेवावे, अशी मागणी नागरिकांकडून करण्यात येत होती.
या प्रश्नाकडे लक्ष वेधत माजी आमदार वैभव नाईक आणि माजी पंचायत समिती सदस्य अतुल बंगे यांनी शासन स्तरावर सातत्याने पाठपुरावा केला. महेश वेळकर यांनीही या मागणीसाठी वेळोवेळी प्रयत्न केले. नागरिकांची गैरसोय लक्षात घेऊन करण्यात आलेल्या या पाठपुराव्याला अखेर यश मिळाले आहे.
पाट-गांधीनगर महसूल सजा पूर्ववत झाल्यामुळे स्थानिक नागरिकांना महसूलविषयक कामांसाठी होणारी धावपळ कमी होणार असून, त्यांची दीर्घकाळापासूनची गैरसोय दूर होण्यास मदत होणार आहे.