कुडाळ प्रतिनिधी✍️ : कुडाळ शहरातील भूगर्भातील पाणीपातळी वाढवून संभाव्य पाणीटंचाईवर मात करण्यासाठी नगरसेवक मंदार शिरसाठ यांच्या पुढाकारातून कुडाळ शहरात विविध ठिकाणी वनराई बंधारे उभारण्यात येणार आहेत. या उपक्रमाचा शुभारंभ बुधवार, २१ ऑक्टोबर रोजी करण्यात येणार आहे.
‘पाणी अडवा, पाणी जिरवा’ या संकल्पनेतून राबविण्यात येणाऱ्या या मोहिमेत स्थानिक नागरिकांच्या श्रमदानातून बंधारे बांधण्यात येणार आहेत. यामुळे पावसाचे पाणी अडवून जमिनीत जिरवण्यास मदत होणार असून, परिसरातील विहिरी आणि कूपनलिकांच्या पाणीपातळीत वाढ होण्यास हातभार लागणार आहे. बुधवारी सकाळी ओमकार नगर येथे श्री. शिंदे यांच्या घराशेजारी पहिल्या बंधाऱ्याच्या कामाला सुरुवात होईल. यावेळी ओमकार नगरमधील नागरिक श्रमदानात सहभागी होणार आहेत. त्यानंतर विठ्ठलवाडी रो-हाऊसशेजारी बंधाऱ्याच्या कामाचा शुभारंभ करण्यात येईल. या ठिकाणीही परिसरातील नागरिकांचा सहभाग लाभणार आहे.पहिल्या टप्प्यातील कामांनंतर कुडाळ शहरातील अन्य भागांतही स्थानिक नागरिकांच्या सहकार्याने वनराई बंधारे उभारण्यात येणार आहेत. लोकसहभागातून शहराला जलसमृद्ध करण्याचा या उपक्रमामागील उद्देश आहे.
कुडाळ शहरातील संभाव्य पाणीटंचाई टाळण्यासाठी आणि पाण्याचे योग्य नियोजन करण्यासाठी राबविण्यात येणाऱ्या या उपक्रमात नागरिकांनी मोठ्या संख्येने सहभागी होऊन सहकार्य करावे, असे आवाहन नगरसेवक मंदार शिरसाठ व संयोजकांच्या वतीने करण्यात आले आहे.