सिंधुदुर्गनगरी प्रतिनिधी ✍️: रस्त्यावर वाहन चालविताना वेगावर नियंत्रण ठेवणे, वाहतुकीच्या नियमांचे पालन करणे आणि स्वतःसह इतरांच्या सुरक्षिततेची काळजी घेणे अत्यंत आवश्यक आहे. कारण आपल्या घरी कोणीतरी आपली वाट पाहत असते, असा भावनिक संदेश सिंधुदुर्गनगरी ओरोस येथील आयटीआयमधील विद्यार्थ्यांना देण्यात आला.
आजचा तरुण उत्साही असून त्याच्याकडे मोठी स्वप्ने आणि ती पूर्ण करण्याची जिद्द आहे. मात्र, वाहनाचा अतिवेग, निष्काळजीपणा किंवा काही क्षणांचा थरार अनेकदा जीवघेणा ठरतो. एका अपघातामुळे केवळ संबंधित व्यक्तीच नव्हे, तर संपूर्ण कुटुंबाच्या आयुष्यावर त्याचा गंभीर परिणाम होतो. त्यामुळे विद्यार्थ्यांनी वाहन चालविताना विशेष खबरदारी घेण्याचे आवाहन करण्यात आले.
रस्त्यावर वेगाने वाहन चालविल्याने काही सेकंदांचा वेळ वाचू शकतो; मात्र त्याच वेगामुळे आयुष्यभराची हानी होण्याची शक्यता असते. प्रत्येकाच्या घरी आई-वडील, भाऊ-बहीण आणि मित्र आपली वाट पाहत असतात. त्यामुळे आपल्या सुरक्षिततेला सर्वाधिक प्राधान्य देणे गरजेचे आहे.
रस्ते अपघातामध्ये एखादी व्यक्ती जखमी झाल्यास त्याचा परिणाम संपूर्ण कुटुंबावर होतो. अपघातानंतरची रुग्णालयातील धावपळ, उपचारांचा त्रास आणि कुटुंबीयांची होणारी मानसिक घालमेल याची किंमत कोणत्याही वेगाने भरून निघू शकत नाही. त्यामुळे वाहन चालविताना जबाबदारीने आणि संयमाने वाहन चालविण्याचा संदेश विद्यार्थ्यांना देण्यात आला.
यावेळी विद्यार्थ्यांनी दुचाकी चालविताना हेल्मेटचा वापर करावा, तर चारचाकी वाहनात सीट बेल्ट लावावा, असे आवाहन करण्यात आले. तसेच रस्ता मोकळा असला तरी वेगमर्यादेचे उल्लंघन करू नये, वाहन चालविताना मोबाईलचा वापर टाळावा, सिग्नल, वाहतूक चिन्हे व नियमांचे काटेकोरपणे पालन करावे, अशा सूचना देण्यात आल्या.
अल्पवयीन विद्यार्थ्यांनी वाहन चालवू नये. वाहन चालविण्याची अनुज्ञप्ती (लायसन्स) प्राप्त झाल्यानंतरच वाहन चालवावे, असेही यावेळी स्पष्ट करण्यात आले.
रस्ते सुरक्षा ही केवळ नियमांची बाब नसून प्रत्येकाच्या जीवनाशी आणि कुटुंबाच्या भवितव्याशी संबंधित आहे. त्यामुळे “वेगावर नियंत्रण ठेवा… कारण घरी कोणीतरी तुमची वाट पाहत आहे!” हा संदेश विद्यार्थ्यांनी कायम लक्षात ठेवावा, असे आवाहन करण्यात आले.