मुंबई प्रतिनिधी✍️: महाराष्ट्रातील दुष्काळग्रस्त भागांना मदत करण्यासाठी शिर्डी येथील साईबाबा संस्थानने पुढाकार घेतला आहे. दुष्काळ निवारणाच्या कार्यासाठी संस्थानच्या वतीने मुख्यमंत्री सहाय्यता निधीसाठी ५ कोटी रुपयांची आर्थिक मदत देण्यात आली आहे.
या मदतीचा धनादेश मुख्यमंत्री देवेंद्र फडणवीस यांच्याकडे सुपूर्द करण्यात आला. राज्यातील दुष्काळग्रस्त नागरिकांना आवश्यक मदत उपलब्ध करून देण्यासाठी या निधीचा उपयोग करण्यात येणार आहे.
महाराष्ट्रातील विविध भागांमध्ये दुष्काळाची परिस्थिती निर्माण झाल्यास त्याचा सर्वाधिक फटका शेतकरी आणि ग्रामीण भागातील नागरिकांना बसतो. अशा परिस्थितीत साईबाबा संस्थानने मुख्यमंत्री सहाय्यता निधीसाठी दिलेली ही आर्थिक मदत दुष्काळ निवारणाच्या प्रयत्नांना बळ देणारी ठरणार आहे.
साई संस्थानच्या या निर्णयातून सामाजिक बांधिलकी आणि आपत्तीच्या काळात गरजू नागरिकांच्या मदतीसाठी पुढाकार घेण्याची भूमिका अधोरेखित झाली आहे.