सिंधुदुर्गनगरी प्रतिनिधी ✍️ : सिंधुदुर्ग जिल्ह्याच्या प्रशासकीय यंत्रणेत महत्त्वाचा बदल करण्यात आला असून, सतीश पंढरीनाथ बागल यांची जिल्ह्याच्या अपर जिल्हाधिकारीपदी नियुक्ती करण्यात आली आहे. राज्य शासनाच्या सामान्य प्रशासन विभागाने त्यांना अपर जिल्हाधिकारी (गट-अ) संवर्गात पदोन्नती देण्याचा आदेश जारी केला आहे.
सिंधुदुर्गच्या अपर जिल्हाधिकारी शुभांगी अनिल साठे यांची मुंबई येथील महाराष्ट्र राज्य महिला आयोगाच्या उपसचिवपदी बदली करण्यात आली आहे. त्यांच्या बदलीमुळे रिक्त होणाऱ्या पदावर सतीश बागल यांची नियुक्ती करण्यात आली आहे.
शासनाने २४ ऑगस्ट २०२६ रोजी जारी केलेल्या आदेशानुसार, आस्थापना मंडळाच्या शिफारशीच्या आधारे निवडश्रेणी उपजिल्हाधिकारी संवर्गातील पात्र अधिकाऱ्यांना अपर जिल्हाधिकारी संवर्गात पदोन्नती देण्याची प्रक्रिया राबविण्यात आली. या प्रक्रियेत सतीश पंढरीनाथ बागल यांना अपर जिल्हाधिकारी (गट-अ) पदावर पदोन्नती देण्यात आली आहे.
शासनाने निश्चित केलेल्या अटी व शर्तींच्या अधीन राहून ही पदोन्नती देण्यात आली आहे. तसेच संबंधित अधिकाऱ्यांना नव्या पदावर रुजू होण्यासाठी त्यांच्या सध्याच्या पदावरून एकतर्फी कार्यमुक्त करण्याचे निर्देशही आदेशात देण्यात आले आहेत.
या प्रशासकीय निर्णयामुळे सिंधुदुर्ग जिल्ह्याला नवीन अपर जिल्हाधिकारी मिळणार असून, जिल्ह्याच्या प्रशासकीय कामकाजाची जबाबदारी आता सतीश बागल यांच्याकडे सोपविण्यात येणार आहे.