सिंधुदुर्ग स्वरूपा सौदागर✍️: यंदा पावसाचे प्रमाण कमी राहिल्याने अनेक भागांत भविष्यात पाणीटंचाईची परिस्थिती निर्माण होण्याची शक्यता आहे. त्यामुळे पाणीटंचाई सुरू झाल्यानंतर उपाययोजना करण्यापेक्षा आत्तापासूनच पाण्याचे नियोजन आणि बचत करणे गरजेचे आहे. पाणी हा अमूल्य नैसर्गिक स्रोत असून त्याचा प्रत्येक थेंब जपणे ही केवळ प्रशासनाची नव्हे, तर प्रत्येक नागरिकाची जबाबदारी आहे.
घरगुती वापरातील पाण्याचा अपव्यय तातडीने थांबवणे, नळ सुरू ठेवून काम न करणे, गळणारे नळ व पाइपलाइन वेळेत दुरुस्त करणे, वाहन व घर धुण्यासाठी पाण्याचा अनावश्यक वापर टाळणे यासारख्या छोट्या उपाययोजनांतून मोठ्या प्रमाणात पाणी वाचू शकते. शक्य असल्यास पावसाचे पाणी साठवणे आणि पुनर्वापर करणे, तसेच घरातील वापरलेले पाणी बागेसाठी किंवा इतर योग्य कामांसाठी वापरण्याचा प्रयत्न करावा.
शेती करणाऱ्या नागरिकांनीही उपलब्ध पाण्याचा काटकसरीने वापर करण्यासाठी ठिबक किंवा तुषार सिंचनासारख्या पद्धतींचा अवलंब करावा. सोसायट्या, ग्रामपंचायती आणि स्थानिक संस्थांनी विहिरी, तलाव, बंधारे तसेच जलसाठ्यांची स्वच्छता व देखभाल करण्याबरोबरच पाणीगळती रोखण्यावर भर द्यावा.
पाणीटंचाई ही अचानक निर्माण होणारी समस्या नाही; तिची चाहूल आधीच लागते. त्यामुळे आजपासूनच पाण्याचा प्रत्येक थेंब जपला, तर उद्याची टंचाई काही प्रमाणात निश्चितच कमी करता येईल. ‘पाणी वाचवा, पाणी जिरवा आणि पाण्याचा काटकसरीने वापर करा’ हा संदेश प्रत्येक घरापर्यंत पोहोचणे ही काळाची गरज आहे.